AWAL (16e-edition)

Seg Tewrirt yettwattun ar Wedrar n Baya, tekcem ssinima n tmaziɣt amaḍal n tẓuṛi tis 7 si tewwurt-is yehrawen, syin d afella llan kra n isura yuẓan ɣer weswir ageraɣlan am wid  n imerhumen Abederraḥman Bouguermouh akk d Azeddine Meddour. Ma nessiked ɣer yiḍelli, ɣer laɛtab n wid yefkan imɣi i ssinima amaziɣ ad yettuḥettem fell-aɣ s Useqqamu n Tfaska Tadelsant Taɣelnawt n Usaru Amaziɣ akken ad nḥareb ɣef weswir-agi adelsan  yellan d agerruj n imaziɣen d izzayriyen s umata. Ayen yettumeyzen di tfaska-yagi tis 16 d asmekti n tidmi n Dda Lmulud At Mɛemmeṛ yeddren d akerraz n Yedles s umata, ula d ssinima yefka-yas amur-is : Tawrirt yettwattun, Taḥcict d uɛekkaz. D aymi tt-budden tafaska-yagi i « wafud n tṣekkiwin tungalatin n Mulud At Mɛemmeṛ almend n useflali n ssinima n tmaziɣt ». Ssinima tazzayrit tufrar-d deg umaḍal s usuqqel n tegnatin n tegrawla yessawḍen ad ssakin ula d iɣeṛfan imalen ɣer temḥeṛṣa, maca tidett tuklal ad tt-id-nini mazal-aɣ nebɛed akken aḥric adelsan-agi ad yuɣal d tamguri.